Asturias4Steam

Entrevistas

Publicado el 18 de Junio de 2021

Esti mes falamos con Margarita Fernández Mier, Catedrática d’Historia Medieval de la Universidá d’Uviéu, de un proyeutu didaúticu muy prestosu nel que l’arqueoloxía ye una ferramienta al traviés de la cual averar el métodu científicu a les rapacines y los rapacinos del CP Balmonte faciéndo-yos participar en tolos procesos y fases d’una escavación arqueolóxica. Margarita tien una trayeutoria en forma llarga n’investigación en distintes instituciones, lo que-y da una perspeutiva bastante complexa de lo que tien de ser la investigación, la docencia y cómo tien de repercutir na sociedá.

Dende’l grupu d’investigación que dirixes, LLABOR, tais intentando sacar l’arqueoloxía d’esa torre de marfil. ¿Qué ye esto de l’arqueoloxía comunitaria?

Nós trabayamos direutamente cola xente y col territoriu al traviés de l’arqueoloxía. Ye perimportante reflexonar sobre’l papel que xugamos na sociedá y sobre cómo facer participar a toa esa xente, a la que tamos investigando y que na mayoría de los casos dexamos al marxen, tanto de los conocimientos que sintetizamos, como de les decisiones que se tomen en rellación col patrimoniu . Nun se trata de traducir la investigación en papers Q1 -que tamien, eso hai que facelo- sinón en convertila nuna ferramienta útil pa la xente qu’habita nesos territorios. Intentamos caltener l’alta producción científica, pero colos pies afitaos na tierra pa coneutar con esa xente sobre la que tamos investigando.

Si bien ye verdá que llevabeis tiempu informando en blog y en redes sociales sobre’l trabayu del grupu en 2014 decidisteis dar un pasín más.

Nos caberos años fálase muncho de “Arqueoloxía pública” que significa facer partícipe a la xente de la investigación. Les primeres esperiencies que ficimos foron alderiques y xornaes pa tresmitir la importancia de los yacimientos a la xente de los pueblos nos que tábemos escavando. En 2013, Jesús Fernández echó a andar l’Ecomuséu La Ponte en Santu Adrianu y a partir de la esitosa experiencia, plantegámonos da-y una vuelta a lo que tábamos faciendo na excavación, dando-y el formatu de talleres arqueolóxicos pa rapacines y rapacinos. L’oxetivu yera integrar el conocimientu llocal, clave pa interpretar yacimientos y afondar na conocencia de los sociedáes del pasau; y asina diseñamos una serie de talleres rellacionaos cola escavación: talleres de coción de cerámica, reconstrucción d’una cabana neolítica…, pero siempre contando coles aportaciones de la xente que tien tovía conocimientos: los que saben facer pan, teitar… y foi un ésitu.

Y d’ehí, lo siguiente ye el proyeutu ConCiencia Histórica, una esperiencia d’arqueoloxía comunitaria na qu’enredáis al colexu públicu de Balmonte y al Ayuntamientu de Balmonte de Miranda y que ye’l principal motivu d’esta entrevista. ¿En qué consiste la propuesta?

Dimos el pasu de trabayar col pueblu, colos turistes, a trabayar colos escolinos y escolines de Balmonte. Fai tres cursos plantegámonos cola direución del colexu que’l proyeutu didaúticu xirase arrodiu la investigación sobre’l Monasteriu de Santa María de Lapedo, un yacimientu de referencia en Balmonte; yera una manera de xuntar la nuesa investigación en Vigaña, col sitiu nel que taben los escolinos. La idea yera convertir l’arqueoloxía na ferramienta al traviés de la cual averar el métodu científicu a les rapacines y los rapacinos, faciéndo-yos participar en tolos procesos y fases d’una escavación arqueolóxica y qu’entiendan y vivan cómo se xenera’l conocimientu históricu.

¿Por qué Balmonte?

Porque ye’l conceyu onde tamos escavando y amás porque conozo a la direutora del colexu dende fai munchos años. Facía tiempu que veníamos falando d’ello y tamien nos influyó les munches conversaciones que les dos tuviemos per años con una maeestra d’infantil del colexu, María Jesús. Nuria compartió con’ella años de docencia y yo munches conversaciones cuando y daba clase a la mio fía. Pienso que foi una bona influencia nes dos y hai que reconoce-ylo, amas foi una pena que nun pudo ver los resultáos de los últimos cursos. Pero pel branu cuando facíamos la escavación yera imposible facer participar al colexu porque en xunetu taba pesllao. Falando cola direutora, Nuria Peláez, decidimos participar ensin nengún tipu de sofitu esternu nel cursu 2018-2019, esperimentando a ver que resultaba col allumnáu. Nel curso siguiente ya contamos cola financiación de la FECYT que lleva dos cursos sofitando’l proyeutu.

Esti ye un proyeutu que d’entamu muncha xente enxamás pensaría encuadrar na tipoloxía de proyeutos STEAM

Si, como tu dicíes xeneralmente los proyeutos STEAM paez que siempres se sofiten na Teunoloxía, les Ciencies…, pero nesti casu la intención yera emplegar el patrimoniu pa introducilos nel métodu científicu y qu’entamen a da-y valir al patrimoniu llocal, los raigaños del territoriu nel que tan viviendo. Y eso, probablemente ye lo más importante nel mundu rural, esa ye la batalla, da-yos ferramientes de calter identitariu y de revalorización del mundu rural.

En esa revalorización del patrimoniu y los saberes llocales ¿Hasta qué puntu influye tener unos raigaños mui fondos nel mundu rural como ye’l to casu?

Eso ye perimportante porque fai que lo veas d’una forma distinta y llévate a plantegate cómo tolo que se fai dende’l mundu científicu tien de repercutir positivamente nesi mundu rural del que munches vegaes nun somos a pescanciar los códigos. Amás, tamién influye muncho en da-y valir a esa cultura rural y poner n’equilibriu’l conocimientu científicu y la conocencia llocal. Entiendo que ye difícil pa los investigadores renunciar al espexismu de la superioridá del conocimiento científicu, pero hai que tener mui presente la xente que dende milenios foi atesorando experiencia de conocencia del mediu, que nun podemos escaecer y que hai qu’equilibrar col mundo científicu. Nesti casu ye mui sintomático que la mayor parte de la xente que collabora col grupu d’investigación tien que ver col mundo rural; dempués de once años d’investigación, somos conscientes que la güeyada de la xente que tienen raigaños no rural ye mui distinta de la perceición de la xente que nun tiene más referente que la ciudá. Ye un interesante esperimentu sociollóxicu.

De visita al yacimientu del Cuernu

¿Cómo se desendolca’l proyeutu nun cursu normal?

Al entamu’l cursu facemos una actividá de motivación. Esi añu llevamos a tola comunidá educativa al yacimientu del Cuernu que tábemos escavando en Vigaña, que tá a 1100 m d’altitú. Tuvimos que rozar un camín pa poder llevalos en todoterrenos y que viesen lo que ye una escavación arqueolóxica y se motivaren pal desendolcu del proyeutu a lo llargo’l cursu. Ya dende esi momento contamos col sofitu del Ayuntamientu, así que podemos decir que’l proyectu ye una tayuela afítada en tres pates: el colexu, la Universidá y l’Ayuntamientu.

Y a partir d’ehí empieza’l trabayu nel aula pa documentase.

Diseñamos una unidá cola documentación qu’hai sobre’l monasteriu qu’agora mesmo ta en ruines nuna finca nes afueres de Balmonte. Ye un pequeñu averamientu históricu, una información mínima pa que los docentes emprincipiaren a trabayar colos neños y neñes.

Taller de Zooarqueoloxía

La ciencia y la teunoloxía tan mui presentes nos talleres que vais ufiertando demientres el cursu.

Eso ye. Diseñamos una serie de talleres qu’amosaben les actividaes que se lleven a cabu nuna escavación. Por exemplu, un taller d’arqueoloxía forense, pa desplica-yos cómo estudiamos un enterramientu pa sacar información sobre la vida de les sociedaes del pasáu. Otru de zooarqueoloxía, pa qu’entiendan qué entrugues nos facemos cuando atopamos güesos d’animales nun yacimientu, por exemplu: cuándo se maten, qué tipu de ganao teníen. Otru foi un taller de reconstrucción en 3D de les pieces de cerámica qu’atopamos; tamien facemos un taller cerámica con Orlando Morán que llega a facenos un fornín pa cocer les pieces que fan los neños y neñes, ahí ya entra la conocencia científica y la etnográfica. Esti añu ficimos unu del estudiu de los carbones que atopamos nes excavaciones. Cada cursu intentamos buscar coses distintes.

Taller de memoria oral

Tamos trabayando sobre la sociedá en xeneral, así que tamién facemos talleres de tradición oral con Ambás y Ramsés, que siempres mos echen un gabitu y a los que tengo qu’ agradecer la so desintresada collaboración. Lo mesmo que a Nieves González, la panadera, que siempre se pon a disposición. La idea ye revalorizar esi tipu de cultura. El proyeutu busca l’equilibriu ente diferentes tipos de saberes y todos tenemos coses qu’apurrir.

Escolinos del CP Balmonte escavando

Y too esti trabayu nun se fai porque sí.

Too esto termina cola escavación nel monasteriu y esti añu cola escavación nel medio del pueblu. Dempués de deprender munches cosines facemos una escavación seria. Yo digo-yos a les neñes y los neños que vamos a pasar de xugar cola arqueoloxía, a escavar de verdá. Ye importante que los rapacinos y rapacines escaven, que s’empuerquen, que s’emocionen viendo si-yos sal cerámica o non, que sepan lo que ye peñerar, cribar, inventariar…, pero darréu hai que deducir a partir d’ehí. Lo importante ye que vean que nun sólo ye pasalo bien, sinón que tienen qu’albidrar, que sacar conclusiones.

Y esa última parte ye precisamente la que suel tar ausente de les clases convencionales d’historia

Esa ye la barrera que siempres quisimos francer. Pues tener un públicu que se siente y escuche, pero eso nun ye tresferencia del conocimientu. La única manera de que sepan lo que ye’l trabayu científicu ye faciéndo-yos participar braeramente en tolos procesos.

Tolos proyeutos xeneren unos resultaos ¿Qué se fixo coles conclusiones que sacaron?

El primer cursu les rapacines y rapacinos organizaron una feria nel parque’l pueblu p’amosar lo qu’atoparen y desplicar cómo algamaren determinaes conclusiones. Armaron una conferencia y desplicaben too con un pallabreru específicu. Llamónos l’atención la naturalidá cola qu’emplegaben términos como estratigrafía, desamortización…

Otra actividá que primero yera dalgo marxinal, que nun taba planeada, pero qu’acabó tornando en dalgo mui guapo foi llocalizar tolos restos del monasteriu qu’había desperdigaos per Balmonte. Hai un montón de sillares, bases, columnes peles cases y muries del pueblu. Fízose una catalogación con una fichina pa dir metiendo nuna base de datos aú taben los restos del monasteriu, foron llocalizándolos, faciendo-yos semeyes y viendo cómo se trabaya col patrimoniu.

Nel proyeutu collabora l’Ayuntamientu de Balmonte que-yos propunxo facer una ruta basándose na documentación que ficieren.

Eso ye lo que vino en llamase la “Chalga de los Escolinos”, un percorríu señalizáu que pues facer agora mesmo si vas a Balmonte. Y eso enlazaba col proyeutu de contratu-serviciu que tenía el colexu.

Otru oxetivu del proyeutu ye fomentar vocaciones científiques, pero veo diferencies con iniciatives d’esti tipu, porque nun vos sofitais tanto n’alderiques motivacionales, sinón que ponéis a les escolines y escolinos a trabayar coldu con coldu con investigadores que tan n’estayes diferentes de la so carrera y qu’amás trabayen en fasteres de conocimientu dixebraes.

Participa muncha xente. La mayor parte de es actividáes sofítense nel trabayu de Pablo López, que pertenez al grupu d’investigación; tamién participen otros becarios o investigadores que tan entamando coles investigaciones o que tienen proyeutos d’investigación en marcha. Esti añu, el proyeutu taba pensáu en tornu al conceutu del agua que se trabayó de una manera perinteresante dende’l colexu. Tol profesoráu tuvo mui implicáu y nosotros fuimos adaptando los talleres y actividades al proyeutu. Por exemplu, participó on line una alumna mía que ta trabayando en Perú con sistemes aterrazaos nel mundu inca; ficimos una conexón colos escolinos y escolines pa falar sobre esti tema y que vieren lo importante que ye l’agricultura y la naturaleza n’eses cultures.

Paezme que con esto yá podemos facenos una idea de lo potente que ye esta propuesta, pero nun puedo dexar d’entrugate hasta qué puntu influyó la to llabor como docente nel ámbito universitariu pa iguar esti proyeutu. ¿Esto d’averar l’arqueoloxía a neñes y neños de Primaria yera dalgo a lo que-y llevabes tiempu dando vueltes?

Demientres tuvi na Universidá de Llión impartí durante catorce años l’asignatura de Didáutica de la Historia n’Educación Primaria; esta reivindicación ñaz d’ehí. Nesos catorce años tuvi tiempu a da-y munches vueltes a qué había que facer nuna asignatura d’esti tipu. Y tengo pendiente volcar toes este idees nun manual. Catorce años pensando col alumnáu cómo formalos como maestros que darréu algamen despertar interés y vocaciones ente los neños y les neñes a los que-yos van poner clas.

Yo reivindico la importancia de la didáutica de la historia. Nel casu de mio sirvióme pa decatame de cómo tenemos de tresmitir eso y cómo nos tenemos qu’implicar nesi procesu; camiento que ye un equívocu pergrave la estremadura qu’hai ente los departamentos de Didaútica y la xente que trabaya nes distintes disciplines.

¿Hai esperiencies asemeyaes n’otres comunidaes autónomes, países o esto ye dalgo nuevo?

Sí. De fechu esti añu ficimos un cursu ente’l CSIC y la Universidá d’Uviéu que s’entitulaba “Si haces ciencia, divúlgala” y ehí punxéronse sobre la mesa una serie d’iniciatives mui diverses. Hai un grupu mui potente del CSIC en Barcelona que trabaya temes de Prehistoria con coleutivos marxinales. Tienen un proyeutu mui guapu n’El Rabal, otru con xente discapacitada. Y tamién hai muncha xente trabayando n’Extremadura, Andalucía nel mediu rural. Nel ámbitu internacional too esto tien munchu más desarrollu sobre todo nel mundu anglosaxón.

¿Qué ye lo siguiente?

La nuesa idea ye da-y una vuelta, porque sedría perimportante poder llevar esto a los institutos. Creo qu’hai que dir afitando esti tipu de cuestiones colos institutos de la zona y d’ehí enllazar cola Universidá. Col institutu yá se pue trabayar d’otra manera, asina que cuando salga la siguiente convocatoria de los proyeutos FECYT, tenemos que da-y una vuelta y ver cómo dir dando pasos n’esti sen. De mano esti cursu ya ficimos coses tamien col colexu de Proaza, aunque se fizo como estraescolares, non dentro del proyeutu didáuticu.

Pues gracies y norabona.